Archive for April, 2011

April 30, 2011

Lahore ki Baqra Eideen.

by afatqiamat

Hum jab tak Bhatti sahib key kiraya dar rehey, jo keh taqreebn 11-12 Sal tek they, hum ney aik adh daffa key elawa kabhi khud say Bakra naheen khareeda, our na hi kabhi Qurbani kay liyee Qasai kiyaa..

Bhatti sahib mashallah say her sal , 7-8 bakroon ki qurbani kertey they.
Har Sal , Dubai chowk per Nirala key samnay maidan meen aik Bakrey wala aa jaata thaa… wooh Bakray tool ker beycha kertaa thaa , 30-40 janwar laata thaa , Bhatti sahib un meen say her saal kabhi 10 kabhi 12 our aik saal to 22 bakray bhi khareeday they.
apnay 7-8 key elawa , kissi sal aik our kissi sal do hamary hoootey they, our 6-7 mohallay waloon key liyee hootey they..
Bakra Eid say aik raat pehley, us kay paas pohunch jaatey they ,our jitney bhi bakrey khareedney hootey they , chun leytey they , phir unko tool ker mool lagwa leytey they …
our youn her saal whole sale khareedari kerttey they..

aysay sastey partee they, kiyoon key akhethey khareedney per Bakray wala riyat ker deytaa tha , us kay bhi akethey bik jaatey they , ziada jhanjhat naheen uthana pertaa tha .our baqiyoon ko bhi khuwar naheen hoona pertaa thaa.

Janwar us ka saaf suthra our achaa hoota thaa.

in 11-12 Saal meen hum ney kabhi Qasai bhi naheen kiyaa ,so humeen to maloom hi naheen hoota thaa keh us season meen Qasai ka rate kiyaa chal rehaa hey…

Bhatti sahib sarey key sarey bakrey khud kiyaa kertey they..
Bakra eid walay din subha subha namaz perh ker wooh our unki Factory key 4-5 mulazim aa jaatey they ,picheley sehen meen , Line say Bakrey gira deytey they , jis jis ka hota thaa , woh us per churi pheyr deyta thaa….phir her koi apney hissay kaa kaam kiyaa kertaa thaa..

hum ney Churi pheyrna, our Khal utarna , our baad meen Gosht meen say suthray tareeqay say Chanpeen banana aysee si seekhaa…
khas masala banana bhi ,our behtereen tareeqay say bhonenna bhi aysee si seekhaaa….. hamaray masalay our bhoneneny ki kafi demand hoo gayee thee….

Gosht per Masalay meen hum sirkay our Dahi ka istamal kertey they , aik khas tanasub say , jis say us meen narmi bhi peydaa hooti thee, bhun bhi jaldee jaata our uskay ander ras bhi rehtaa , jo key aik alag hi maza deytaa thaa .

gharz jitna arsaa Lahore meen , Bhatti sahib key Kirayadar rehay , Bakra Eid aik Alag shaan say manayee..

ub ….yehan Karachi meen halat alag heyn , koshish kertey heyn , keh kam is kam aik Hissa gayee meen hi daal leyn ….7-8 ath sal huway ……. aik adh saal to hissa bhi na daal sakay …. is saal inshallah dal leyn gey …
Gaayee key hissa ka 3950 say 4700 Rs ka hiss bantaa hey …. 4300 rupee hoo gayee heyn… allah behteree karey gaa…

April 28, 2011

Hamari Zindagi ka Mo’ema

by afatqiamat

yeh humari zindaga ka aik moema hey, hum aam tour say larkiyoon say dour hi rehay ,na hi kissi our larki ney hum meen koi khas dischaspee lee, or agr lee bhi to humeen pata naheen chalaa.

per jub bhi , humari zindagi men koi na koi ” CRISIS ” ayee, janay kahan say koi na koi larki ya khatoon dobtey ko tinkay ka sahara deyney a gayee .

humari behen ki shadi thee, walid ney hi apnay tamam behnoon or bhaiyoon ko parhaya likhaya, or unkay ghar banayee they, or apnay behen bhayoon ki zimidarioon ki wajah say apni hi aulad ko buri terha nazar andaz kiyaa thaa , walida ki beenai ka masla thaa, per phir bhi wooh humari her mumkin tarbiyat ki koshish kertee theen ,per jub unki apni beeti ki shadi hoonay ko ayee, to ghar meen aik bhoonchaal saa aa gayee, tamam chachaa, or phophiyaan jaisay apni aglee pichlee tamam dushmaniyaan nikalney ko a gayee , mamlaat bohot ziada kasheeda ho gayee, yehan tak key Tamam Karobar ka batwara kiyaa geyaa, or humaray walid key hissay meen sirf aik Khali dukan ayee , baqi tamam sarmaya , rupeeiya paisay tamam chachaoon or phoophiyoon key hath chala geyee.
humeen wooh ghar choorna peraa , or aik our kirayee key ghar meen jaana peraa , wooh dousara ghar bikhra bikhra sa , per barkat waala thaa,
humaray walid ney , dukan key pichley hissay per aik darwaza lagwa diyaa, or us ko humaysha band rekha, or khud agaly hissay meen do maiz dal ker beyth gayee,

pichlay hissay ko band rekhnay ka maqsad thaa, keh gahak ko patta na chalay keh pichley hissay meen kitnaa maal peraa hey, khali dukan meen ghahak naheen aataa , so is terha apnay maal per perda dal diyaa…
gahak say souda kernay kay baad, wooh bazar say mal ka arrangement kertey they , aisay meen unki mali halat per bhi perda rehtaa thaa , or bharam bhi qaim rehtaa thaa.
Walid kaha kertey they, dukan dar ko do hi chezen chupa ker rekhnee hooti heen, aik Mal , dousra dam.
Mal say murad , keh kitna maal moujood hey , or kitna maal mohiyaa ker sektey heen.

aap khud deykh leen , gahak bari dukan say maal leytaa hey, bohot kam chooti dukan per cherhataa hey, per 80% say zaid humara mushahida or tijarba hey, woohi bari dukan waala , kissi bazahir chooti dukan, say, wooh mal ley reha hoogaa.
yehan , asl meen wooh chooti dukan wala hi , bara wholeseller hooga , bus uskay pas jugha ki kami hoogi , ya woooh khud retail naheen kerna chahtaa hoo ga, is liyee sirf supply ka kaam kerta hoo gaa , or supply kay kaam kay liyee dukan naheen godam ki zaroorat hooti hey…

khair chooreen in karobari batoon koo, khair humari behen ki shadi per aik hangama thaa, kafai halat kharab they, yeh to afreen hey, keh dulha waloon ney mamlaat ko samjha , or humara sath diyaa, khair up behen allah kay karam say , apnay bachoon ki bhi shadi ker chuki heen, or mian biwee sal kay 7-8 maheenay amrika meen lagatey heen.
per is waqay say hum bilkul hi toot gayee, humeen pehlay bhi walid ki tawju naheen millee , per iskay baad to hum bilkul hi , ajeeb see tanhai or beyzari ka shikar hoo gayee , is waqt Rebacca Alexander doobtay ko tinkay ka sahara sa bun gayee…

na na ghalat na samjheen , is meen koi ishq-ashqi waghaira ka koi chakar naheen, bus janay kiyoon wooh hum say ghulnay milney lagee , halankey university meen bohot say larkay , uski aik nazar kay liyee khuch bhi kernay ko teyar theey.
per jaisaa keh huum pehlay bhi keh chukey heen , keh koi aashiqi washqi ya flirt waghaira ka chakar neheen…
bus us sakht waqt meen uska achanak hi say hum say ghul mil jaana , doobtay ko tinkay ka sahara thaa, hum ney kahbi bhi apni gharayloo mushkilaat kissi say bhi discuss naheen ki, apnay kissi dost say bhi naheen , or us say bhi naheen , laikin uska is terha achanak aana hi humaray hosloon ko sahara deyney ka liyee kaafi thaa.
or hum jantey heen usko bhi pata naheen hooga keh usnay humari is tarha anjanay meen kitnee madad kee thee.
uskay liyaa humaray dil say dua nikeltee hey keh wooh jahan bhi rehey khush rehey or humeyshaa kamiyab rehey.

aisay hi aik crisis meen humari mulakat Robin Belmay say hui , Robin ghalibn Amreeka meen rehtee hey, hum nay usaa aaj tak deykha naheen , bus ICQ per bat hooti rehee hey,

aisay hi Linda Haris, hum uskay baray meen to yeh bhi naheen jantey keh wooh rehtee kahan heey, laikin us key ghehrey mushahiday or baat ki teh tak pohunch janay ki khoobi ney humeen naya rasta dikhayaa hey….

Zindagi key talkh tijarboon say hum ney aik hi cheez deykhee hey, kehtey heen

” Apna maray to chaooon mee dalay ” per humara kehna hey, marta bhi sirf apna hi hey, so , us kay baad say hum ney tamam loogon say bus wajabi sa , akhlaqan waza dari ki had tak taluq rekhany ka teheeyaa or musamam irada ker liyaa hey…

humaray is faisalay say bohot say loogon ko takleef hooti hey, per is meen bhi unhi keh behteree hooti hey, aisay meen ghari zaroori tawaquat banenay say pehlay hi khatam hoo jaati heen , or ayenda ki kissi barai takleef or mayosi say insaan bacha rehtaa hey…

April 26, 2011

Ilm deen ka Almiya ……….??

by afatqiamat

Ilm deen aksr nazr aata hey , per janay kiyoon hum apus meen baat naheen kertey….

aaj to bohot hi toota toota sa lag rehaa thaa…..kafi kamzoor , shave bhi barhee huwi …or thaka thaka saa….. khamoshi say chai pee reha thaa…..kapra albataa saf suthree of istaree kiyee huway thee….. nafees insaan hey…..per ub yeh kaprey us per dheeley dheelay say lag rehey they….

hum himmat ker key uth ker uskay paas chaley gay…..or poocha kiyaa haal hey…..,Kehney laga theek…………

phir khuch kamoshi key baad boolaa…..

……….hamarai doosri beyti ki mangni ker dee hey ……

hum ney kaha mubarak hooo..

humeen aysaa laga keh uski ankhoon meen ansoo teyr gayee heyn…………kehnay laga …….humeen batayaa hi naheen geyaa…..!! ………..aysaa lagtaa hey hum ub un sub ki zindagiyoon say nikl gayee heyn…….aisay keh jaisay they hi naheen…..!!

phir uthaa………..or chalaa geyaa…..!!

hum larz ker reh gayee………..!! itnaa toota huwa insaan……….janay zinda kaisay hey….??

wazeh rehey ………Ilm deen or uski bewi meen elehdagi hoo chuki hey, bewi …bachiyoon ko ley ker chalee gayee hey………..or ilm deen ……….idher hi…….hey..

hey kiyaa………..buw aysay hi hey….!

or hum yeh pochna to bhool hi gayee………..keh usko kaisay pata chalaa….??

or khali khali nazaroon say Quetta Talash hotel meen lagay …..TV key screen ko dykhney lagay………….jis per aik nayaa gana ………..Dum maro dum….Deepika Padokouney per filmaya huwaa chal rehaa thaa…or wooh keh rehe thee….

Oonchay say ooncha bandaa

pooti bey beythey nangaa.. ……..dum maroo dum….

PS : yeh 23 March ki  Tehrir hey ,  Aaj 26 April 2011 key , humeen kissi zariyee say pata chala hey keh Ilm Deen kee beeti ki Shadi ghalibn  28 April 2011 ko hey …

Or wooh badnaseeb Baap………….uska kiyaa kareen…??

April 25, 2011

Gaye ka Hissa

by afatqiamat

Apna gaye ka hissa leyney nikley to deykha Dr Sajjad or unkay bacheey idhar udhar bhag rehey heen, maloom huwa unki gaye rassi tura ker bhag gayee…
dayr kerdee unhoon ney , gari nikalney kay chakar meen leg gayee, is  douran aisee bhagi keh mil ker na dee.
…majbouran doubara bakra mandi gayee, or nai gayee lai, abkay charoon taraf say rasioon say jakar ker rekha huwa tha…
pehlay 35 hazar ki lai they, unkay susti see mil gai , 16-17 hazar kee.
khair hum ney bhi Masjid ki ijtamia qurbani meen aik hissa daalaa tha….halankey hum hissa dalney kay qabil naheen , magar phir bhee.
humara hissa Haji pakwan walay say sath per geyaa, haji bhi bara hushiyar hey, qurbani ki qurbani, or hotel kay leeyaa gosht ki supply bhi .
Humaray hissay meen Bong ka gosht aa reha thaa , Haji seekh paa hooney legaa , hum shayeed hissa badal leytey us say, magar zid cherh gayee , to sara hissay ussee kay samney apnay hathoon say bant deeyaa , haji ko tilmilata huwa deykh ker humeen na jaanay kiyoon khushi hoonay lagee ,
Bong nikal gayee uskay hath say.
waisay sachee baat hey , humeen gosht ki pehchaan naheen , wooh to qasai nay hi bataya keh humaray hissay meen Bong ka gosht aa reha hey.
sham ko phir wooohi khali hath.
shukar hey chacha soup wala ayee huwa tha, hum ney soup khareeda or apni khooli meen ja ker khob mazay say piayaa.
chacha hohot hushiyar hey, chicken corn Rs 20 ka , anday kay sath Rs 25 ka , or sweet and sour Rs 25 ka anday key sath Rs 30 ka beychtaa hey,
Hum bhi uski rag rag say wakif heen , hum us say parcel kerwatey heen, isterha aam tour say kam us kam derh piyala to nikal hi aata hey,
yeh our baat hey, baad meen barten khud dhooney pertey heen.

aaj itwar hey, Karachi meen Barish hoo rehey heey, acha hey, qurbani kay khoon kay sath , shayeed loogon kay gunah bhi dhul jaeen…..humari kholi aik taraf say tapakney lagee hey, subha deykheen gay .

NOTE : Yen 2007 ka likha huwa hey

April 23, 2011

Abla paa

by afatqiamat

Abla pa , rakht-e-safar hey humara
akeyley chalna aadat hey humari

jin raastoon pey man chalta hoon
Junoon-e-zeest chaheeya unper

wog aag , wooh tapish, woh bhanwar
Her koi naheen tikta unkay agay.

so akeyley chaley they hum , qaflay kay sath
qafla manziloon meen gum huwa
or hum chaltey rehay apni dagar.

so is tanhai ki aadat meen.
sub ajnabi manoos ajnabi
sub rishtay sarab say rishtey

khakh-o-dhool pareey sar meen

or Junoon ki manzileen heyn hamari
April 22, 2011

Dadi Merhomma

by afatqiamat

humeen aksar apni dadi bohot yaad aati heen, halankey , ub to humeen unki shakal bhi sahi say yaad naheen, unka inteqal uswaqt huwa tha jub hum kafi chootey they.

Humari Dadi Merhoma ko galay ka cancer thaa, dacteroon ney jawab dey diyaa tha, sub ghar walay pereyshan they, or unko bachaney kay liyee khuch bhi ker saktey they

Kissi ney aik attai baba ka keha , jo Mangopir ki paharioon kay peechay kaheen rehtey they, sub unko wahan ley gayee , us attai baba nay khuch perha , or aik helka sa chirka unkay bazoo per laga diyaa, thora sa khon baha , sub us attai baba per bohot naraz huway, per chirka to lag chuka thaa, so wapus a gayee..

magar , chargh-e-akhri shab ki tarha, jo bujhney say pehlay bharpoor timtimata hey, dadi aik dum theek see lagney lageen, or sub us attai baba key karishmay kay qail hoo gayee.

per uskay do haftay baad hi, unka inteqal hoo gayee.
per wooh sub to yaqini -bayyaqini kay aik aisay dohrahay per chhoor geya , jehan zehen meen sirf waswasay hi reh jaatey heen…… or samnay hi haqeeqat per yaqeen naheen aata .

yeh haqiqat amr hey, charagh bujhney say pehlay , khoob roshnee deyta hey , shayeed is terha sadmay ka asr shock ki kaifiyat meen jaa ker khuch dard kam ker deyta hey.

April 20, 2011

Karachi key Footpathiyaa khanay

by afatqiamat

Hum Plaza flats meen rehtey they ,Marie Colaco key perhey huway  heyn, Marie Colaco ub key Naz shoping center pehley key Naz Cinema key peechey hoota thaa…hum aksar wahan say  Bunder Road per nikaltey phir sarak crass ker key Rimpa Plaza key sath sath …apnay ghar jaatey they.

Rimpa Plaza say pehley Tram Goodi hooti thee…yeh Karachi meen chalney wali trams ka Ada thaa.. Petrol pump key barabar aik Chacha  beythtaa thaa.. is  say hum ney pehli baar  Kathiwari chooley khayee they…Hamaray school key bahir  bhi  Alo chaat walay , Ganda Golay walay , bhuni huwi makayee walay or Kulfi walay hootey they …. chachay key sath kabhi kabhi aik Massi bhi aa ker beythee they …iskay paas aalo kachaloo hootey they ……….aaloo kachaloo hum ney Sindh Madrsay key bahir say bhi bohot khayee .. Purana Karachi masln  Lee Market , Burns Road ,New Chawli , Jubliee , ..waghaira aaj bhi aysay bohot say khanoon key liyee mashoor heyn.

read more »

April 19, 2011

Lahore key Footpathiyee Khanay

by afatqiamat

Aik Arsa Lahore rehy , khaba khajaa bohot hey , per jo mazaa  footpathiyee khanoon ka hey wooh kissi our ka naheen.

jub Chamberlain Road per they , to dopeher ko aksar  “chikar chooloon ” say lutf andooz hootey they ,mood banay to   Dacter ki Niharee , wooh bhi sardiyoon meen ja ker khatey they ,itnee sardee partee thee keh mayz tak aatay aatey thandi hoo jaaati thee, to uska intazam maiz per hi burner laga ker kiyaa geyaa thaa , …phir Sardar ki machlee , ya  Hareesa , kabhi kabhi landa bazar meen hotel say  Palak gosht , daal fry ya  anda chooley , us hotel ki khas baat  wooh coutner per  sonf rakhtaa thaa , jo wapsi meen chabaty huway bara maza aata thee….wahan say wapsi per koney per moujood doodh ki dukan say  peyray wali Lassi , Tabiyat khush hoo jaati thee ….

read more »

April 18, 2011

Hamari Na Laiqi

by afatqiamat

Hamari zindagi , aik machine ki tarah hey ….. soo ker uthtey heyn , ….. talash-e-rozgar per challey jaatey hey……… our phir wapus khooli meen aa ker per jaatey heyn….

Aik machine ki tarah….. humeen patta hi naheen chaltaa keh hamary aas paas kiyaa hoo rehee hay…… haan …kabhi kabhi urtee urtee see khabareen miltee heyn….to humeen andaza hoota hey….

yeh baat sub ko ajeeb lagey gee….. magr hamary walid sahib , ney Umra ker liyaa our humeen patta bhi naheen challaa…

unkay paas to passport bhi naheen thaa… , janay kab passport banwayaa, kab uskay liyee darkhawast dee…, kab ticket liyaa…..our kab chaley gayee……

humeen to kissi nay batayaa bhi naheen, our na hi humeen paataa chalaa…….

read more »

April 17, 2011

Ilm Deen ka Almiya part 4

by afatqiamat

( Dec 2009 )

Ilm Din Milla thaa , akeyla chai pee raha thaa, Quetta talash hotel per …. hum bhi sath hi ja ker beyth gayee… chai mangai our hal chal poochaa… .. usey elehda huway huway 8 saal hoo gayee, or humeen tanhaa huway huway ….2 sal . kehney laga suna hey , pas perda masaleht kee koshisheen hoo rahee heyn ya theen…wooh abhi manzar namey per naheen ayee….. hum sochney lagay , per dil key sheesay per pari darar , ub hat naheen saktee….dil key sheeshay ka yeh baal , khatam naheen hoo sakta…or jis sheeshay meen bal aa jayee….uska hoona , na hoona barabar hoota hey …. wazeh rehey, ilm din kee bewi , jub khud kamanay lagee to ilm din ko choor ker chali gayee….!! phir kehney laga , aysee waqt bulkey is say bhi bura waqt us kay susral

read more »

%d bloggers like this: